ਨਵਾਂਸ਼ਹਿਰ 4 ਫਰਵਰੀ ) ਕੈਂਸਰ ਵਰਗੀ ਬਿਮਾਰੀ ਦੀ ਰੋਕਥਾਮ ਲਈ ਜੀਵਨ-ਬਚਾਊ ਦਵਾਈਆਂ ਤੇ ਸਬੰਧਤ ਸਾਜੋ ਸਮਾਨ ਨੂੰ ਪੇਸ਼ ਹੋਏ ਬਜੱਟ ਵਿੱਚ ਸਸਤਾ ਕਰਨ ਦਾ ਪ੍ਰਸਤਾਵ ਪ੍ਰਸੰਸਾਯੋਗ ਹੈ। ਇਸ ਦੇ ਨਾਲ੍ਹ ਹੀ ਡੇਂਗੂ ਵਰਗੀ ਖਤਰਨਾਕ ਬਿਮਾਰੀ ਵੇਲੇ ਲੋੜੀਂਦੇ ਪਲੇਟਲੈਟਸ ਇੱਕਠਾ ਕਰਨ ਵਾਲ੍ਹੀ ਕਿੱਟਾਂ ਨੂੰ ਵੀ ਸਸਤਾ ਕਰਨ ਦੀ ਲੋੜ ਹੈ ਕਿਉਂਕਿ ਮਰੀਜ਼ ਨੂੰ ਇੱਕ ਯੂਨਿਟ ਲਈ ਗਿਆਰਾਂ ਹਜਾਰ ਪੰਜ ਸੌ ਰੁਪਏ ਅਦਾ ਕਰਨੇ ਪੈਂਦੇ ਹਨ। ਇਸ ਮੰਗ ਨੂੰ ਕੇਂਦਰ ਸਰਕਾਰ ਤੱਕ ਪੁੱਜਦਾ ਕਰਨ ਲਈ ਬੀ.ਡੀ.ਸੀ ਵਰਗੀਆਂ ਸਮਾਜ ਸੇਵੀ ਸੰਸਥਾਵਾਂ ਨੂੰ ਯਤਨ ਕਰਨੇ ਚਾਹੀਦੇ ਹਨ।ਇਹਨਾਂ ਵਿਚਾਰਾਂ ਦਾ ਪ੍ਰਗਟਾਵਾ ਸ੍ਰੀ ਤ੍ਰੀਕਸ਼ਨ ਸੂਦ ਸਾਬਕਾ ਮੰਤ੍ਰੀ ਪੰਜਾਬ ਨੇ ਸਥਾਨਕ ਬੀ.ਡੀ.ਸੀ ਬਲੱਡ ਸੈਂਟਰ ਦੇ ਸੱਦਭਾਵਨਾ ਨਿਰੀਖਣ ਕਰਦਿਆਂ ਕੀਤਾ। ਉਹਨਾਂ ਨੇ ਖੂਨਦਾਨ ਭਵਨ ਤੋਂ ਦਿਨ-ਰਾਤ ਹੁੰਦੀ ਸੇਵਾ ਵਾਰੇ ਜਾਣਕਾਰੀ ਪ੍ਰਾਪਤ ਕੀਤੀ। ਡਾ. ਅਜੇ ਬੱਗਾ ਵਲੋਂ ਪਲੇਟਲੈੱਟਸ ਕਿੱਟਾਂ ਨੂੰ ਸਸਤਾ ਕਰਨ ਦੀ ਮੰਗ ਨੂੰ ਕੇਂਦਰ ਸਰਕਾਰ ਤੱਕ ਪਹੁੰਚਾਉਣ ਦੇ ਯਤਨ ਕਰਨ ਦਾ ਭਰੋਸਾ ਦੁਆਇਆ। ਸ੍ਰੀ ਤ੍ਰੀਕਸ਼ਨ ਸੂਦ ਵਲੋਂ ਮੰਗੀ ਗਈ ਜਾਣਕਾਰੀ ਦੇ ਜੁਆਬ ਵਿੱਚ ਦੱਸਿਆ ਗਿਆ ਕਿ ਥੈਲੇਸੀਮੀਆ ਬਿਮਾਰੀ ਤੋਂ ਪੀੜਤ ਮਰੀਜ਼ਾਂ ਨੂੰ ਬਗੈਰ ਚਾਰਜਿਜ਼ ਅਤੇ ਪਹਿਲ ਦੇ ਅਧਾਰ ਤੇ ਸੇਵਾ ਦਿੱਤੀ ਜਾਂਦੀ ਹੈ। ਇਸੇ ਤਰ੍ਹਾਂ ਕੈਂਸਰ ਦੀ ਬਿਮਾਰੀ ਤੋਂ ਪੀੜਤ ਮਰੀਜ਼ਾਂ ਨੂੰ ਘੱਟ ਚਾਰਜਿਜ਼ ਤੇ ਖੂਨਦਾਨ ਸੇਵਾ ਦਿੱਤੀ ਜਾਂਦੀ ਹੈ। ਉਹਨਾਂ ਹੋਲ-ਬਲੱਡ ਤੇ ਬਲੱਡ-ਕੰਪੋਨੈਂਟ ਸੇਵਾ ਸ਼ਾਖਾਵਾਂ ਅਤੇ ਹਾਈ-ਟੈਕ ਲੈਬ: ਨੂੰ ਵੀ ਵੇਖਿਆ ਤੇ ਜਾਣਕਾਰੀ ਪ੍ਰਾਪਤ ਕੀਤੀ। ਉਹਨਾਂ ਮਨੁੱਖੀ ਜਾਨਾਂ ਬਚਾਉਣ ਦੇ ਕਾਰਜਾਂ ਤੇ ਸਤੁੰਸ਼ਟੀ ਪ੍ਰਗਟ ਕਰਦਿਆਂ ਸੰਸਥਾ ਦੀ ਪ੍ਰਸੰਸਾ ਕੀਤੀ। ਇਸ ਮੌਕੇ ਜੀ.ਐਸ.ਤੂਰ, ਜੇ ਐਸ ਗਿੱਦਾ, ਡਾ ਅਜੇ ਬੱਗਾ, ਮੈਨੇਜਰ ਮਨਮੀਤ ਸਿੰਘ, ਡਾ.ਦਿਆਲ ਸਰੂਪ ਤੇ ਸਟਾਫ ਹਾਜਰ ਸੀ। ਸੰਸਥਾ ਵਲੋਂ ਤ੍ਰੀਕਸ਼ਨ ਸੂਦ ਨੂੰ ਸਨਮਾਨਿਤ ਕੀਤਾ ਗਿਆ।
