ਵਾਰਡ ਨੰਬਰ 10 ਅਤੇ ਅਜਨਾਲਾ ਦੇ ਤਹਿਸੀਲ ਕੰਪਲੈਕਸ ਵਿਖੇ ਸੜੀਆਂ ਦੁਕਾਨਾਂ ਦਾ ਲਿਆ ਜਾਇਜ਼ਾ
ਮੁੱਖ ਮੰਤਰੀ ਰਾਹਤ ਫੰਡ ਚੋਂ ਸਹਾਇਤਾ ਕਰਨ ਦਾ ਦਿੱਤਾ ਵਿਸ਼ਵਾਸ
ਅਜਨਾਲਾ, 5 ਅਗਸਤ --ਅਜਨਾਲਾ ਦੀ ਪੁਰਾਣੀ ਕਚਹਿਰੀ ਅਤੇ ਵਾਰਡ ਨੰਬਰ 10 ਵਿਚ ਸਥਿਤ ਦੋ ਦੁਕਾਨਾਂ ਜੋ ਦੇਰ ਰਾਤ ਅੱਗ ਲੱਗਣ ਨਾਲ ਸੜ ਗਈਆਂ ਸਨ, ਦਾ ਜਾਇਜ਼ਾ ਲੈਣ ਲਈ ਹਲਕਾ ਵਿਧਾਇਕ ਸ ਕੁਲਦੀਪ ਸਿੰਘ ਧਾਲੀਵਾਲ ਪਹੁੰਚੇ, ਜਿਨਾਂ ਵੱਲੋਂ ਦੁਕਾਨ ਮਾਲਕਾਂ ਨੂੰ ਵਿਸ਼ਵਾਸ ਦਵਾਇਆ ਗਿਆ ਕਿ ਮੁੱਖ ਮੰਤਰੀ ਰਾਹਤ ਫੰਡ ਚੋਂ ਬਣਦੀ ਹੋਈ ਸਹਾਇਤਾ ਦਿੱਤੀ ਜਾਵੇਗੀ । ਸ ਧਾਲੀਵਾਲ ਨੇ ਕਿਹਾ ਕਿ ਜਿੰਦਗੀ ਵਿੱਚ ਔਖੇ ਸੌਖੇ ਸਮੇਂ ਆਉਂਦੇ ਰਹਿੰਦੇ ਹਨ ਪਰ ਲੋੜ ਹੁੰਦੀ ਹੈ ਕਿ ਜਦੋਂ ਆਪਣੇ ਕਿਸੇ ਭਰਾ ਉੱਤੇ ਔਖਾ ਸਮਾਂ ਆਵੇ ਤਾਂ ਉਸ ਦਾ ਸਾਥ ਆਪਾਂ ਸਾਰੇ ਦਈਏ। ਉਹਨਾਂ ਕਿਹਾ ਕਿ ਮੈਂ ਮੁੱਖ ਮੰਤਰੀ ਪੰਜਾਬ ਵੱਲੋਂ ਰਾਹਤ ਕੋਸ਼ ਵਿੱਚੋਂ ਸਹਾਇਤਾ ਲੈ ਕੇ ਦਿਆਂਗਾ ਅਤੇ ਸਾਡੇ ਭਾਈਚਾਰੇ ਨੂੰ ਵੀ ਇਹਨਾਂ ਦੇ ਸਹਿਯੋਗ ਲਈ ਅੱਗੇ ਆਉਣਾ ਚਾਹੀਦਾ ਤਾਂ ਜੋ ਇਹ ਸਾਡੇ ਭਰਾ ਮੁੜ ਪੈਰਾਂ ਸਿਰ ਹੋ ਸਕਣ।
ਇਸ ਮੌਕੇ ਤੇ ਦੁਕਾਨਦਾਰ ਅਮੋਲਕ ਸਿੰਘ ਨੇ ਕਿਹਾ ਕਿ ਪਿਛਲੇ ਦਿਨੀ ਦੁਕਾਨ ਸੜਨ ਨਾਲ 10 ਤੋਂ 11 ਲੱਖ ਰੁਪਏ ਦਾ ਨੁਕਸਾਨ ਹੋ ਗਿਆ ਸੀ ਤੇ ਅੱਜ ਸ ਧਾਲੀਵਾਲ ਦੇ ਆਉਣ ਨਾਲ ਉਹਨਾਂ ਨੂੰ ਹੌਸਲਾ ਮਿਲਿਆ ਹੈ ਮੁੜ ਅੱਗੇ ਵਧਣ ਦੀ ਪ੍ਰੇਰਨਾ ਮਿਲੀ ਹੈ । ਉਹਨਾਂ ਨੇ ਸ ਧਾਲੀਵਾਲ ਦਾ ਵਿਸ਼ੇਸ਼ ਧੰਨਵਾਦ ਵੀ ਕੀਤਾ।
