ਸ਼ਹੀਦ ਬਾਬਾ ਜੈ ਸਿੰਘ ਖਲਕਟ ਦਾ 270ਵਾਂ ਤਿੰਨ ਦਿਨਾਂ ਸ਼ਹੀਦੀ ਸਮਾਗਮ ਅੱਜ ਤੋਂ, ਕਈ ਸਾਰੇ ਮਹਾਂਪੁਰਖ ਕਰਨਗੇ ਕੀਰਤਨ

ਪਟਿਆਲਾ, 26 ਫਰਵਰੀ :- ਸਿੱਖ ਕੌਮ ਦੇ ਮਹਾਨ ਪੰਜ ਅਮਰ ਸ਼ਹੀਦਾਂ ਦੀ ਯਾਦ ਨੂੰ ਸਮਰਪਿਤ 270ਵਾਂ ਸਲਾਨਾ ਸ਼ਹੀਦੀ ਸਮਾਗਮ 27 ਫਰਵਰੀ 2023 ਨੂੰ ਸ਼ੁਰੂ ਹੋਕੇ 1 ਮਾਰਚ ਤੱਕ ਚੱਲੇਗਾ। ਪਟਿਆਲਾ ਤੋਂ ਸਰਹਿੰਦ ਰੋਡ ਤੇ ਪਿੰਡ ਬਾਰਨ ਵਿਚ ਇਸ ਸਮਾਗਮ ਵਿਚ ਕੀਰਤਨ ਦੀਵਾਨ ਸਜਾਏ ਜਾਣਗੇ। ਇਹ ਜਾਣਕਾਰੀ ਦਿੰਦਿਆਂ ਗੁਰਦੁਆਰਾ ਸ਼ਹੀਦ ਬਾਬਾ ਜੈ ਸਿੰਘ  ਜੀ ਖਲਕਟ ਪਿੰਡ ਬਾਰਨ ਦੀ ਕਮੇਟੀ ਨੇ ਦਸਿਆ ਕਿ 27 ਫਰਵਰੀ ਨੂੰ ਸੰਤ ਬਾਬਾ ਹਰਬੰਸ ਸਿੰਘ ਜੈਨਪੁਰ ਵਾਲੇ ਕੀਰਤਨ ਦੁਆਰਾ ਨਿਹਾਲ ਕਰਨਗੇ। 28 ਫਰਵਰੀ ਨੂੰ ਗਿ. ਪ੍ਰਿਤਪਾਲ ਸਿੰਘ ਕਥਾਵਾਚਕ ਪਟਿਆਲਾ ਵਾਲੇ ਤੇ ਸੰਤ ਬਾਬਾ ਭਗਵੰਤ ਸਿੰਘ ਢੀਂਡਸਾ ਅਤੇ ਸੰਤ ਬਾਬਾ ਸੁਖਵਿੰਤਦਰ ਸਿੰਘ ਟਿਬੇਵਾਲੇ ਕੀਰਤਨ ਦੁਆਰਾ ਸੰਗਤਾਂ ਨੂੰ ਰੁਹਾਨੀਅਤ ਨਾਲ ਨਿਹਾਲ ਕਰਨਗੇ। 1 ਮਾਰਚ ਨੂੰ ਅਮ੍ਰਿਤ ਸੰਚਾਰ ਹੋਵੇਗਾ ਤੇ ਕਕਾਰਾਂ ਦੀ ਦੀ ਮੁਫਤ ਸੇਵਾ ਕੀਤੀ ਜਾਵੇਗੀ। ਇਸ ਕੀਰਤਨ ਦਰਬਾਰ ਵਿਚ ਸੰਤ ਬਾਬਾ ਧਰਮ ਸਿੰਘ ਸੰਗੋਵਾਲਾ ਵੀ ਪੁੱਜਣਗੇ। ਪ੍ਰਬੰਧਕ ਕਮੇਟੀ ਨੇ ਦਸਿਆ ਕਿ ਤਿੰਨੇ ਦਿਨ ਗੁਰੂ ਦਾ ਲੰਗਰ ਅਤੁਟ ਵਰਤੇਗਾ।